සැවැත් නුවර දී ය …..
මහණෙනි, සය කරුණකින් සමන්විත වූ භික්ෂුව එයට උපකාරවන කරුණු තිබිය දී ත් ඒ ඒ විශේෂ ගුණයෙන් ප්‍රත්‍යක්ෂ බවක් ඇති කරගන්නට හැකියාව නැත්තේ ය. ඒ කවර සයකින් ද යත්;
මහණෙනි, මෙහිලා භික්ෂුව ‘මේවා පිරිහීම පිණිස ඇති ධර්මයෝ ය’ යැයි ඒ වූ සැටියෙන් ම නොදන්නේ ය. ‘මේවා කුසල් පිහිටා සිටීම පිණිස ඇති ධර්මයෝ ය’ යැයි ඒ වූ සැටියෙන් ම නොදන්නේ ය. ‘මේවා විශේෂත්වය පිණිස ඇති ධර්මයෝ ය’ යැයි ඒ වූ සැටියෙන් ම නොදන්නේ ය. ‘මේවා විනිවිද වැටහෙන නුවණ පිණිස ඇති ධර්මයෝ ය’ යැයි ඒ වූ සැටියෙන් ම නොදන්නේ ය. සකස් කොට නොකරන්නේ ද වෙයි. සප්පාය නොවන දේ කරන්නේ ද වෙයි.
මහණෙනි, මේ සය කරුණෙන් සමන්විත වූ භික්ෂුව එයට උපකාරවන කරුණු තිබිය දී ත් ඒ ඒ විශේෂ ගුණයෙන් ප්‍රත්‍යක්ෂ බවක් ඇති කරගන්නට හැකියාව නැත්තේ ය.
මහණෙනි, සය කරුණකින් සමන්විත වූ භික්ෂුව එයට උපකාරවන කරුණු තිබෙන විට ඒ ඒ විශේෂ ගුණයෙන් ප්‍රත්‍යක්ෂ බවක් ඇති කරගන්නට හැකියාව ඇත්තේ ය. ඒ කවර සයකින් ද යත්;
මහණෙනි, මෙහිලා භික්ෂුව ‘මේවා පිරිහීම පිණිස ඇති ධර්මයෝ ය’ යැයි ඒ වූ සැටියෙන් ම දන්නේ ය. ‘මේවා කුසල් පිහිටා සිටීම පිණිස ඇති ධර්මයෝ ය’ යැයි ඒ වූ සැටියෙන් ම දන්නේ ය. ‘මේවා විශේෂත්වය පිණිස ඇති ධර්මයෝ ය’ යැයි ඒ වූ සැටියෙන් ම දන්නේ ය. ‘මේවා විනිවිද වැටහෙන නුවණ පිණිස ඇති ධර්මයෝ ය’ යැයි ඒ වූ සැටියෙන් ම දන්නේ ය. සකස් කොට කරන්නේ ද වෙයි. සප්පාය දේ කරන්නේ ද වෙයි.
මහණෙනි, මේ සය කරුණෙන් සමන්විත වූ භික්ෂුව එයට උපකාරවන කරුණු තිබෙන විට ඒ ඒ විශේෂ ගුණයෙන් ප්‍රත්‍යක්ෂ බවක් ඇති කරගන්නට හැකියාව ඇත්තේ ය.
සාදු! සාදු!! සාදු!!!
සක්ඛිභබ්බ සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an4_6-2-2-7/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M