සැවැත් නුවර දී ………………
පින්වත් මහණෙනි, උපන් සත්වයන්ගේ පැවැත්ම පිණිසත්, උපතක් කරා යන සත්වයන් හට රුකුල් දීම පිණිසත්, මේ ආහාර සතර හේතුවෙනවා. මොනවද මේ ආහාර සතර? ගොරෝසු හෝ සියුම් හෝ කබලිංකාර ආහාරය. දෙවෙනි ආහාරය ස්පර්ශ ආහාරයයි. මනෝසංචේතනාව තුන් වෙනි ආහාරයයි. සතර වන ආහාරය නම් විඤ්ඤාණයයි. පින්වත් මහණෙනි, මෙන්න මේ ආහාර සතර උපන් සත්වයන්ගේ පැවැත්ම පිණිසත්, උපතක් කරා යන සත්වයන් හට රුකුල් දීම පිණිසත් හේතු වෙනවා.
ඉතින් පින්වත් මහණෙනි, ඔය ආහාර සතරේ මුල මොකක්ද? මොකෙන්ද හටගන්නේ? මොකෙන්ද උපදින්නේ? මොකෙන්ද බිහිවෙන්නේ? ඔය ආහාර සතරේ මුල තණ්හාවයි. තණ්හාවෙනුයි හටගන්නේ. තණ්හාවෙනුයි උපදින්නේ. තණ්හාවෙනුයි බිහිවන්නේ.
පින්වත් මහණෙනි, ඔය තණ්හාවේ මුල මොකක්ද? මොකෙන්ද හටගන්නේ? මොකෙන්ද උපදින්නේ? මොකෙන්ද බිහිවෙන්නේ? ඔය තණ්හාවේ මුල විඳීමයි. විඳීමෙනුයි හටගන්නේ. විඳීමෙනුයි උපදින්නේ. විඳීමෙනුයි බිහිවන්නේ.
පින්වත් මහණෙනි, ඔය විඳීමේ මුල මොකක්ද? මොකෙන්ද හටගන්නේ? මොකෙන්ද උපදින්නේ? මොකෙන්ද බිහිවෙන්නේ? ඔය විඳීමේ මුල ස්පර්ශයයි. ස්පර්ශයෙනුයි හටගන්නේ. ස්පර්ශයෙනුයි උපදින්නේ. ස්පර්ශයෙනුයි බිහිවන්නේ.
පින්වත් මහණෙනි, ඔය ස්පර්ශයේ මුල මොකක්ද? මොකෙන්ද හටගන්නේ? මොකෙන්ද උපදින්නේ? මොකෙන්ද බිහිවෙන්නේ? ඔය ස්පර්ශයේ මුල ආයතන හයයි. ආයතන හයෙනුයි හටගන්නේ. ආයතන හයෙනුයි උපදින්නේ. ආයතන හයෙනුයි බිහිවන්නේ.
පින්වත් මහණෙනි, ඔය ආයතන හයේ මුල මොකක්ද? මොකෙන්ද හටගන්නේ? මොකෙන්ද උපදින්නේ? මොකෙන්ද බිහිවෙන්නේ? ඔය ආයතන හයේ මුල නාමරූපයි. නාමරූපයෙනුයි හටගන්නේ. නාමරූපයෙනුයි උපදින්නේ. නාමරූපයෙනුයි බිහිවන්නේ.
පින්වත් මහණෙනි, ඔය නාමරූපයේ මුල මොකක්ද? මොකෙන්ද හටගන්නේ? මොකෙන්ද උපදින්නේ? මොකෙන්ද බිහිවෙන්නේ? ඔය නාමරූපයේ මුල විඤ්ඤාණයයි. විඤ්ඤාණයෙනුයි හටගන්නේ. විඤ්ඤාණයෙනුයි උපදින්නේ. විඤ්ඤාණයෙනුයි බිහිවන්නේ.
පින්වත් මහණෙනි, ඔය විඤ්ඤාණයේ මුල මොකක්ද? මොකෙන්ද හටගන්නේ? මොකෙන්ද උපදින්නේ? මොකෙන්ද බිහිවෙන්නේ? ඔය විඤ්ඤාණයේ මුල සංස්කාරයි. සංස්කාරවලිනුයි හටගන්නේ. සංස්කාරවලිනුයි උපදින්නේ. සංස්කාරවලිනුයි බිහිවන්නේ.
පින්වත් මහණෙනි, ඔය සංස්කාරවල මුල මොකක්ද? මොකෙන්ද හටගන්නේ? මොකෙන්ද උපදින්නේ? මොකෙන්ද බිහිවෙන්නේ? ඔය සංස්කාරවල මුල අවිද්‍යාවයි. අවිද්‍යාවෙනුයි හටගන්නේ. අවිද්‍යාවෙනුයි උපදින්නේ. අවිද්‍යාවෙනුයි බිහිවන්නේ.
පින්වත් මහණෙනි, ඔය අවිද්‍යාව හේතු කරගෙන සංස්කාර ඇතිවෙනවා. සංස්කාර හේතු කරගෙන විඤ්ඤාණය ඇතිවෙනවා. …. (පෙ) …. ඔය විදිහට තමයි මේ මුළු මහත් දුක් රැසම හටගන්නේ.
අවිද්‍යාව සහමුළින්ම නැතිවෙලා නිරුද්ධ වීමෙන් සංස්කාර නිරුද්ධ වෙලා යනවා. සංස්කාර නිරුද්ධ වීමෙන් විඤ්ඤාණය නිරුද්ධ වෙලා යනවා. …. (පෙ) …. ඔය විදිහට තමයි මේ මුළු මහත් දුක් රැසම නිරුද්ධ වෙලා යන්නේ.
සාදු! සාදු!! සාදු!!!
ආහාර සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn2_1-2-1/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M